نوف ومشعل 5... الكاتبه غسق

ما وعت الا واهي بالمستشفى والمغذي بايدها... وكيس الدم... انتبهت لمشعل واقف عند الشباك معطيها ظهره ويتامل المنظر الخارجي.. كان سرحان ويفكر وبنفس الوقت كان يبين عليه الضيق.. كانت نوف تتامل وقفته... كان جذاب حتى واهو بهالشكل... لف مشعل عليها عشان يتطمن وبسرعه نوف غمضت عينها.... قرب مشعل لعندها ومال بجسمه اكثر وقرب وجهه من وجهها... لاحظ مشعل تورد خديها وابتسم وقال لها بصوت خفيف...

مشعل: ادري انج قاعده...

فتحت نوف عينها وانتبهت له كان قريب منها ولما شافها رفع راسه وقعد يضحك عليها... قعد بالكرسي اللي مقابلها وقالها...

مشعل: انتي ليش ناويه تموتين نفسج من الجوع؟... والمشكله فيج فقر دم حاد...

عدلت نوف من قعدتها وحاولت انها تستجمع قوتها وتقوله

نوف: اصلا انا مسويه رجيم...

مشعل بخباثه: اكيد؟...

تجاهلته نوف وشافت ايدها والابر مغروسه داخل عروقها.. كان هالمنظر لحاله يخوفها...

مشعل: نوف... انا اسف... ما كان قصدي اني اضايقج...

سكتت نوف لفترة وقالت له

نوف: عمي محمد كان دايما يشرب... كل مره اشوفه فيها كان سكران...

رفع مشعل راسه لما نوف تكلمت عن ابوه وانتبه لها ولنبرتها الحزينه في الكلام.. لكن الموضع شد انتباهه بقوه فكان كل تركيزه على الكلام اللي تقوله نوف

نوف: اخر مره شفته فيها كان سكران ودخل عند ابوي الديوان ويبكي بقوه... ابوي كان متضايق عشانه كل مره ابوي كان يقوله اترك هالسم عنك لكن ما طاعه...

لفت نوف على مشعل وشافته شكثر متاثر بكلامها وكملت

نوف: ابوي كان حيل متضايق عشانه... وبعد فتره ابوي كتب ربع الاسهم باسمه وصار ينزل له معاش شهري...

مشعل: انا ما فهمت... ليش عمي ناصر سوى جذي؟..

نوف بضيق: مشعل... انت ما سالت عن ابوك؟.. ما تعرف وينه فعلا؟..

مشعل: لا... ولا يهمني اعرف...

نوف: مشعل... ابوك بامريكا... يتعالج من مرض السرطان

تفاجأ مشعل من الكلام اللي تقوله وحس انه ما يقدر يستوعب اكثر... حط ايده على وجهه من قوى الصدمه... مو معقوله...

تضايقت نوف لانها قالت له... بس اهو اللي اصر وكان يبي يعرف عن السبب..

نوف: عشان جذي ابوي كتب الاسهم باسمه عشان ما ينقطع المعاش اللي ابوي مسويه له...

قام مشعل من مكانه بعصبيه... فك ازرار الدشداشه حس انه مو قادر يتنفس... كان الضيق واضح حيل على وجه مشعل كان يمشي بالغرفه يحاول يستوعب الكلام... لف عليها وسالها..

مشعل: اي نوع من المرض؟..

نزلت نوف راسها وما بغت تتكلم... حس مشعل ان اختنق وحاول قدر ما يقدر ما يبن حزنه لنوف

مشعل باصرار: نووف... اي نوع من المرض؟...

ما قدرت نوف تمسك دموعها وبكت بحرقه... ما قدرت تقوله... حست بغصه... فهم مشعل اي نوع بس اصر انه يسمعه... عطاها ظهره ما كان يبي نوف تشوف حزنه وسالها مره ثانيه..

مشعل: نوف... اي نوع من  مرض السرطان؟..

نوف: لوكيميا...

غمض مشعل عينه... ورفع راسه عشان يمنع دمعة عينه تنزل.. هذا عقاب ربه فيه.. اصاب ابوه بنفس المرض اللي ماتت فيه امه.. شي لا يمكن يتوقعه ولا حتى يتخيله... مرة فترة صمت طويله لا نوف قدرت تعلق ولا مشعل قدر يعبر...

نوف: ما توقعت ان موضوع ابوك راح يهمك حيل...

شافها مشعل وقالها بضيق...

مشعل: وانا بعد... ما توقعت اني راح اتضايق عشانه...

نوف: انا اسفه...

دخلت الممرضه وسلمت عليهم... وشالت المغذي وكيس الدم وقالت لمشعل...

الممرضه: خليها تحاول تاكل قد ما تقدر... لانها ما تقدر تعتمد على المغذي لحاله...

مشعل: ان شاء الله...

الممرضه: اخذ بالك من زوجتك.. لان واضح انها تعاني من مشاكل في التغذيه

مشعل: ان شاء الله..

طلعت الممرضه وشافت نوف مشعل بعصبيه...

مشعل: شفيج؟

نوف: انت ملاحظ كل ما شافونا مع بعض قالوا عنا متزوجين؟.. فرضا اخوان... فرضا رفيجي..

 مشعل: جب يلا... رفيجي؟... ياحلوج... انا شكلي شكل واحد يرافج؟.. انا مو مال هالسوالف والخرابيط الناس لما تشوفني تعرف اني رجال سنع يعني مو راعي خرابيط...

شافته نوف واهي ناقده.. وقالت

نوف: زين ليش ما تكون اخوي؟..

مشعل بتكبير: اخوج؟... انتي شايفه شكلج؟... الحمد لله والشكر... قومي يلا خلينا نوكلج شي...

نوف بدلع: ابي وجبه...

شافها مشعل واهو ناقد...

مشعل: شنو وجبته؟.. انا بوكلج باحسن مطعم بالكويت وتقولين وجبه...

نوف بتحدي: انت ذقت وجبة ماكدونالدز الجديده؟..

مشعل: ماكدونالدز كل يوم عنده وجبه جديده.. امشي بلا وجبه بلا خرابيط...

نوف: سوشي؟...

مشى مشعل متجاهل مطاعم نوف واقتراحاتها وكان مستمتع بكلامها... اخذها مشعل لمطعم يطل على البحر كانت نوف طايره من الفرحه... البحر يجذبها بطريقه ساحره.. اهي تعشقه وتعشق صوته وريحته..

مشعل: شرايج بالمكان؟..

نوف: روووعه... عندهم سوشي؟..

مشعل: شنو؟...

نوف: خلاص خلاص... ابي وجبه...

مشعل ناقد: اقول امشي خلينا نطلع انا عارف انتي مو مال هالمطاعم...

نوف: اضحك والله....

كانت نوف تضحك معاه بعفويه... مما خلى مشعل يرتاح بالقعده.. طلبوا الاكل وكان شهي ونوف خلصت على طبقها كله من كثر الجوع... كانت تتكلم مع مشعل عن بدر ولما خالتها خذت حفيدها... كان مشعل مستمتع بحديثها وكان يعلق ويضحك معاها...

اما بهالوقت رن جرس البيت..

ساره: روزاااا؟... وينها هذي؟... روزاااا؟...

راحت ساره تفتح الباب بنفسها وكان في واحد اول مره تشوفه...

ساره: نعم اخوي شبغيت؟..

سالم: السلام عليكم... مشعل موجود؟..

 ساره: والله لحد الحين ما رد

سالم: احتاج اكلمه ضروي....

ساره: تقدر تنتظره بالديوان على ما يجي...

سالم: اي يجزاج الله خير...

ابتسمت له ساره ابتسامه حلوه ونزلت راسها بخجل....خلت سالم توتر مشى وراها واهو يرقبها فتحت له الديوان وقالت له..

ساره: تفضل... اتوقع ان مشعل على وصول

مشت ساره لكن سالم ضل يراقبها الى ان دخلت البيت...طلبت ساره من روزا تسوي القهوه وتوديها... وبعد عشر دقايق وصل مشعل ونوف انتبه مشعل للسيارة اللي واقفه بره... عرف انها لرفيجه سالم.. دخل الديوان ورحب برفيجه..

مشعل: يا هلاااا ومرحبااا بالحبيب..

سالم: هلاا... هلا فيك

كان رد سالم بارد وابتسامة متصنعه... شوي الا يدخل حمد ويوسف لديوان... تفاجأ مشعل لما شافهم موجودين من دون سابق انذار

يوسف وحمد: السلام عليكم...

مشعل: وعليكم السلام ياهلا... شدراكم ان سالم عندي؟.

حمد: اهو اللي دق علينا ويبينا نجتمع...

لاحظ مشعل الجديه في وجوههم وحس ان في شي قوي تطلب من اصحابه انهم يجتمعون وطرى على باله الشغل..

مشعل: الشغل فيه شي؟..

سالم: لا على العكس الشغل احسن من اول...

مشعل: زين تكلموا قولوا... شعندكم؟...

كل واحد صار يشوف الثاني يبيه يتكلم بداله وانتبه مشعل لنظراتهم وقال بعصبيه..

مشعل: شفيكم؟... مراح تتكلمون يعني؟..

تنهد سالم واستسلم وقال لمشعل

سالم: مشعل... جدك عرف مكانك...

مشعل بصدمه: شنو؟.. اووه... كانت عارف انها مسألة وقت...

سالم: انا اول ما عرفت جيت الكويت على طول عشان ابلغك بالخبر... مشعل... انت لازم تجي معاي..

مشعل: انت من صجك؟.. واخلي بنات عمي بهالحال؟.. مستحيل..

سالم: ما عندك اي خيار ثاني...

مشعل: خلاص انا مستعد اني اواجهه... تعبت من كثر ما اتهرب منه... انا مستعد له..

يوسف: مشعل انت شقاعد تقول؟.. انت تعرف شكثر حاولت امك وعمك ناصر انهم يبعدونك عنه؟..

مشعل: اي.. اعرف... لاني كنت مو مستعد له... والحين انا اكثر من مستعد...

حمد: مشعل... انت ما تعرف لحد الحين اهو شيبي فيك... ولا تعرف شنو ممكن يسوي...

مشعل: خلاص لا تقنعوني... انا قلت مستحيل اخلي بنات عمي بهالوضع يعني مستحيل...

سالم: خلاص على راحتك... بس لازم تعرف شي واحد.. اننا معاك ونساندك ولا تتوقع اننا راح نتفرج من بعيد...

ابتسم مشعل لكلمات صديقه وقاله..

مشعل: شنو راح تسوون يعني؟..

يوسف: يعني اذا فكر انه يأذييك.. اوحتى يضرك..

حمد: احنا راح نكون بوجهه..

ابتسم مشعل لدعم اصدقائه.. اهو فعلا ما عنده اخوان لكن اصداقائه كانو مثل اخوانه...

مشعل: تصدقون نسيت اضيفكم... بسبب هالمناسبه السعيده راح اطلب من عبير تسويلنا قهوه..

وللاسف كان اصدقاء مشعل ما يعرفون شنو يعني قهوة عبير... بس يوسف نط وقاله

يوسف: تكفى خلي نوف تسوي القهوه...

شافه مشعل بتكبر وقال بأزدراء

مشعل: هه قهوة نوف؟... اذا انا ماشربتها بتشربها انت؟...

ضحكوا على تعليق مشعل ولما طلع مشعل من الدديوان لف سالم عليهم وقالهم

سالم: شباب!... عسى نوف اللي فتحت لي الباب؟...

حمد: واحنا شدرانا منو اللي فتح لك الباب...

سالم: وحده حلوه حييل...

تفاجأ يوسف وحمد من كلام سالم معقوله ان سالم يتكلم عن البنات...

حمد: انت تحب البنات؟..

تفاجأ سالم من كلام حمد وقاله بعصبيه...

سالم: شنو؟... شتقصد؟...

يوسف: ما يقصد شي... بس... غريبه انت تتكلم عن البنات... ياخي توقعناك معيوب...

عصب سالم عليهم وصارخ

سالم: معيوووب!؟... ليش؟.. بس لاني ما اتكلم عنهم؟... وكاهو مشعل مايتكلم عنهم ما قلتوا عنه جذي؟..

حمد: مشعل غير.... لاننا كلنا ندري ان مشعل لنوف منذ ابد الابدين...

يوسف: بالضبط ...وبعدين اخنا لفينا أوربا كلها... وامريكا الشماليه والجنوبيه وفوقهم استراليا... ومعاك من 15 سنه ولا تكلمت عن الحريم ولا جبت طاريهم...

سالم بعصبيه: لاني ما كنت افكر فيهم...

حمد: اي مو عشان جذي عبالنا انك معيووب...

سالم: معيوب لاني اخاف الله... معيوب لان عندي خوات واخاف اسوي شي والله يرده لي بخواتي... ولا لاني متربي واخاف على اعراض الناس...

حمد: اي.. 

طق يوسف حمد وشافه بعصبيه... وقال لسالم معتذر...

يوسف: احنا اسفين ما توقعنا انك ارقى من تفكيرنا... سامحنا...

استحى حمد ونزل راسه وسأل سالم..

حمد: يعني طول هالفتره ما كنت تفكر بالحريم؟..

سالم: انت غبي؟.. اكيد كنت افكر.. بس كنت دايما احط الله جدامي...

قام حمد وحب سالم على راسه وقاله معتذر..

حمد: انا اسف... صراحه لو تدري شكنت مفكرك من 15 سنه ما كنت راح تسامحني...

يوسف: سالم ما عليك منه بس منو البنت اللي خلتك تنطق...

سالم: ما اعرفها.. يمكن تكون نوف.. ولا وحده من خواتها...

حمد: نوف خط احمر وانت تدري..

يوسف: وترى في ثلاثه من البنات متزوجين..

حس سالم باكتئاب وضاق خلقه... مع هالاحصائيه مستحيل ياخذ هالبنت...

حمد: بس خلك متفائل...

دخل مشعل ومعاه دلة القهوه.. كانوا يشوفونه مثل اللي مسويين جريمه ويبتسمون له بتصنع من كثر الخوف.. اهم يدرون ان مشعل ممكن يسوي اي شي عشان بنات عمه واولهم نوف..

مشعل: شفيكم... شمسويين؟...

سالم: لا ولا شي... الا اقول مشعل... متى بترد لشغل؟..

كان واضح ان سالم بيغير الموضوع... كانت قعدت مشعل وربعه خفيفه حيل على قلبه ما حس بالوقت واهو يمشي... طقت روزا باب الديوان ولما دخلت كانت جايبه السفره والعشا... تفاجأ مشعل وسال روزا...

مشعل: منو اللي سوى العشا...

روزا: مدام غدير ومدام ابتسام...

مشعل: زين قوليلهم مستر مشعل يقول شكرا...

شاف مشعل ربعه وقالهم واهو مفتخر ببنات عمه...

مشعل: والله وناسه لما تحس ان عندك خوات..

حمد بضيق: لا والله الا غثيثات ويبطون الجبد... انت انطر بس لما يقولون لك ودنا السوق حزتها بس ودك تقول لامك وابوك... ليش جبتوا عيال بعد انا مو مكفيكم...

ضحكوا على تعليق حمد وقاله يوسف

يوسف: امانه شكان رد امك وابوك على السؤال..

حمد: امي تقول يعاونوني.... وابوي يقول احسن منك...

سالم: بهذي عاد صدق ابوك..

ضحكوا على تعليق سالم وجتموعا على العشا.. وفعلا كان طباخ غدير يبيض الوجه كان لذيذ لدرجه انهم اكلوا كل اللي بالصحن... علق حمد من كثر ما كان متلذذ بالاكل...

حمد: مشعل... تكفى قولي اللي طابخه هالاكل مو متزوجه..

ابتسم مشعل لرفيجه وقاله

مشعل: لا متزوجه.. وعرسها قريب بعد... يعني راحت عليك...

انتهز سالم الفرصه وسأل مشعل...

سالم: مشعل بنات عمك كلهم متزوجات صح..

مشعل: اي تقريبا..

يوسف: شتقصد تقريبا...

مشعل: يعني في وحده بس لحد الحين ما جاها نصيبها..

حمد: هذي نوف صح؟..

مشعل: هههه... لا طبعا نوف مو بالحسبه...

توتر سالم وده يسأل اذا كانت هذي اللي فتحت له الباب... بس ما يقدر يتكلم ويسبب حساسيه... كانت القعده ممتعه وطلعوا بوقت متاخر... في اليوم الثاني كانت عبير متوتره ما بقى شي على عرسها.. وصالح الله يهديه صدمها بالتاريخ... دخلت عليها نوف ولقتها متضايقه...

نوف: عبير.. شفيج؟..

عبير: متضايقه يا نوف... احس اني ما سويت شي لعرسي... كنت مخططه اسوي اشياء واجد والحين من كثرهم مو ذاكره تخطيط واحد منهم... احس اني بدخل عليه بدراعه...

ضحكت نوف من تعليق اختها وقالت لها مواسيه..

نوف: وحتى لو دخلتي عليه بدراعه بتظلين احلى واجمل عروس...

ابتسمت عبير من كلام اختها اهي تعرف ان اختها تجاملها بس هالكلام ريحها ورفع من معنوياتها...

عبير: انتي بتروحين الجامعه؟..

نوف: اي عندي محاضره اخلصها وارجع...

عبير: زين ما تقدرين توديني السوق... انتي نزليني للمجمع وروحي محاضرتج ولما تخلصين مريني...

كانت نوف ضد هالفكره ما تحب تخلي اختها بالسوق لحالها وترتبط فيها واهي بالجامعه لكن للضروره  احكام ما كان عندها غير انها توافق..

نوف: خلاص موافقه روحي البسي بسرعه...

طلعت نوف وعبير من البيت نست نوف انها ركنت سيارتها بالشركه لما مشعل طلبها واهي ردت معل مشعل بسيارته راحت نوف لمشعل تكلمه لانها بهالطريقه مراح تقدر تروح لمحاضرتها... لقت مشعل بالديوان

نوف: صباح الخير... مشعل ابي مفتاح سيارتك...

تفاجأ مشعل من الطلب السريع...

مشعل: صباح النور... شتبين بالمفتاح؟..

طلعت عبير من وراهم وتكلمت بدفاعيه...

عبير: البنت بتروح جامعتها... شنو يعني؟...

تفاجأ مشعل من دخلت عبير وما علق وعطاها المفتاح..

مشعل: ما تشوفون شر.... الا عبير ليش رايحه معاها الجامعه؟..

عبير: بشتري اغراض للعرس...

مشعل: بالجامعه؟...

تنهدت نوف وشرحت الموضوع لمشعل..

مشعل: خلاص واذا احتجتوا اي شي بلغوني....

ركبت نوف سيارته وما خلت شي ما تعبثت فيه حتى اضواء السياره والتكييف تعبثت فيه

عبير: نوف بس عاد... امشي... خلصينا من هالطبع....

حركت نوف السياره ومشت وفعلا وصلت نوف عبير للسوق وراحت محاضرتها.... اما بهالوقت دق مشعل على سالم عشان يوصله... ولما طلع مشعل شاف ساره طالعه من البيت انتبه لها وسألها...

مشعل: وين رايحه؟..

ساره: بروح لبيت خالتي... اشتقت ليعقوب...ودقيت على خالتي وطرشت لي سايقها...

مشعل: اهاا.. زين لا تطولين عندها..

ابتسمت ساره لاهتمام ولد عمها

ساره: ان شاء الله...

ركبت ساره السياره اما سالم فكان منتبه لها من اول ما طلعت... ركب مشعل السياره وكلم سالم بالبدايه ما كان منتبه بس لما ابتعدت السياره اللي كانت ساره راكبتها انتبه لمشعل..

سالم: هلا... شكنت تقول؟..

مشعل: اقولك حرك لا نتأخر...

حرك سالم السياره وقال لمشعل وما قدر يتمالك نفسه اكثر...

سالم: هذي... اللي طلعت بنت عمك صح... اهي اللي سوت لنا العشا؟..

حس مشعل ان سؤال سالم فيه سر... شافه بشك وقاله بنبره جاده

مشعل: ليش تسال؟..

توتر سالم وماعرف يرد وقاله..

سالم: لا ولا شي... خلاص انسى الموضوع...

مشعل: انسى الموضوع؟... اقول سالم انطق... ترى انت اول مره تتكلم عن البنات.... ولما تكلمت فيهم تكلمت عن بنت عمي... انت اكيد فيك شي...

سالم: انتوا شفيكم ؟... كل ما فاتحت احد بالموضوع سمعني هالكلمتين؟...

مشعل متفاجأ: شنو؟... انت منو كلمت؟...

توتر سالم وقال لمشعل بخوف...

سالم: لا ولا احد...

مشعل بجديه: انت تعرف انها بنت عمي... صح؟..

تضايق سالم من تفكير مشعل وقاله

سالم: ولانها بنت عمك كلمتك انت... ترى الموضوع ما يستاهل خلاص ماله داعي نتكلم فيه...

ضل مشعل ساكت طول الطريق ولما وصل للشركه قال لسالم

مشعل: انزل خليني اضيفك شي...

سالم بضيق: لا ماله داعي اصلا انا ناوي احجز وارد للندن الشغل هناك متكدس...

عرف مشعل ان رفيجه متضايق بس سكت وطلع من السياره وقبل لا يمشي قال لسالم...

مشعل: ترى ساره مو متزوجه...

طلع مشعل من السياره وترك رفيجه مصدوم لدرجه انه ضيع الكلام... ابتسم له مشعل وقاله بخباثه..

مشعل: يلا ما تشوف شر تروح وترد بالسلامه...

من كثر ما كان سالم فرحان للخبر نزل من السياره ولحق بمشعل وقاله

سالم: يعني اوصل لعند الشركه وما اشرب شي... ياخي عيب

ضحك مشعل على تعليق سالم ودخلوا الشركه كان السكرتير متوتر وراح بسرعه لمشعل واهو خايف..

السكرتير: مشعل في ...شخص دخل للمكتب وطلب انه يشوفك انا ما حاولت اني اطرده لكني خفت من الحراس... سامحني...

شاف مشعل سالم وقاله..

مشعل: تتوقع جدي لقاني بهالسرعه...

سالم: انا بدخل معاك ...

قبل لا يدخل سالم كتب ليوسف وحمد رساله انهم يجون لشركه...دخل مشعل ونفس ما توقع... لقى جده واقف ومعطي للباب ظهره كان يتامل المنظر لان نافذه المكتب كبيره من الارض الى السقف وكان في حارسيين شخصيين واقفين معاه بالغرفه... كان هذا اللقاء اول لقاء لمشعل مع جده... اخذ مشعل نفس قوي وحافظ على رباطه جأشه ومشى بكل ثقى وتكلم ببرود